لازم تخلصين 200 ساعة في أي جهة تحتوي على IT
department.
فيه أماكن دوامها من 8-5 وتخلصين تدريبك بدري وفيه أماكن من 8-2 وفترة
تدريبك تكون شهر وأسبوعين.
بعض الأماكن رجعت بعد إجازة العيد وبعض الأماكن خلصت قبل رمضان يعتمد
على المكان.
حاولي تدورين على أماكن تدريب من بدري.
بالنسبة للأماكن حاولي تدورين في النت وتتصلين وتستفسرين وحاولي
تسألين الدُفع الي قبلك عن أماكن تدريبهم.
لأن الكلية ما تقترح عليك أسماء أماكن كثير ولاتطنشين بحجة أن الكلية
رح تجيب لك مكان لأن نفسيتك رح تتعب كثير
إنه وصلتي لنهاية الترم وباقي ما لقيتي مكان وأنواع القلق.
بعض الأماكن:
- مستشفى الملك فيصل التخصصي ومركز الأبحاث .
- Attar Software Engineering.
- المستشفى الجامعي.
- عمادة تقنية المعلومات.
- عمادة تقنية المعلومات – فرع الفيصلية.
- Aramco.
- عمادة التعليم عن بعد- فرع السليمانية.
- Abdulghani Jewwllery.
- Jeddah Development & Urban Regeneration.
- saudi airlines.
- Zahid.
- 3D Systems.
- National Institute Specialist Training Center.
- KAU Nano Center.
- شركة الاندلوسية .
- National Water Company
- The High Cultural Institute
- AlAhli Bank NCB.
- جامعة الملك عبدالله.
- معهد الرسالة.
- Zuhair Fayez.
- SIGMA.
- eDesing Company.
- Erfan hospital.
- Dallah.
- إعمار.
بالنسبة لطبيعة التدريب في هذي الأماكن ومستواها ما عندي فكرة صراحة.
بعض الأماكن تطلب مقابلة أو CV أو
اختبار تحديد مستوى للإنجليزي.
طبعاً من المشاكل إنه الجهة الي تدربين فيها ما تعلمك شيء يجيبونك على
الفاضي وما تستفيدين شيء فحاولي قد ما تقدرين تعرفين خطة التدريب وتسألين الطالبات
الي أكبر منك.
تدريبي كان في عمادة التعليم عن بعد والمفاضلة كانت على
المعدلات في الآخير كان فيه أماكن فاضيه فستقبلوا أي معدل فرع الفيصلية.
التدريب بدأ يوم الأحد 8/6/2014 وانتهى يوم 21 رمضان.
الدوام يبدأ من الساعة 8 إلى 2 في شهر شعبان ورمضان من 10 إلى 3.
في شهر رمضان كانوا يسمحون لنا نخرج 2:30 وآخر التدريب نطلع الساعة 1
للقروبات الي خلصت شغلها.
البريكات كان فيه بريك من 9:30-10:30 للفطور وفيه بريك للصلاة.
وقت البريك يحددونه معاكم في أول يوم.
في أول يوم عرفنا عن نفسنا وقسمونا لأربعة قروبات عددنا كان تقريباً 30 ( 5 فرع الفيصلية, و25 السليمانية), كل قروب
يحتوي على 8 أو 7 طالبات.
وعرفونا على الشغل الي رح نشتغله في العمادة.
التدريب كان مقسم لفترتين صباحيه من 8-2 ومسائية من 5-7.
من 8-2 نشتغل على مشروع يخص العمادة.
ومن 5-7 نجتمع على النت.
الفترة الصباحية اشتغلنا على أحد مشاريع العمادة بمعدل 165 ساعة:
كان عبارة عن برمجة موقع طبعاً تحليل النظام و الprototype كان
جاهز.
استخدمنا لغة asp.net وC#.
في أول أسبوع كان تعريف بالنظام وفهم لغات البرمجة عن طريق البحث في
النت طبعاً.
بعدها بدأنا شغل برمجة في البداية حسيت بصعوبة بس بعدين صار الوضع
عايدي واللغات ما كان فيها صعوبة كبيرة لأن asp.net تعتمد علىhtml و C# تشبه ال
java في
أشياء كثير.
كان اعتمادنا بشكل كبير على الأكواد الي في النت.
الفترة المسائية بمعدل 30 ساعة:
كان برنامج تدريبي في Second Life هو عالم افتراضي 3D طبعاً فيه الشين والزين ممكن تتعلمين
إنجليزي فيه أو تعرضين مشروعك فيه كثير محلات يكونون فاتحين لهم محل وفيه موظف خاص
مسؤول وكمان فيه جامعات تعطي محاضرات وكثيييير أشياء بس صراحة ما أنصح الأطفال
يدخلونه لأن فيه بعض الأماكن موكويسه.
في الأسبوع كان فيه ثلاث لقاءات:
كل أسبوع يكون فيه دورة تتكلم عن موضوع معين يأهلونك للحياة المهنية
مثل:
- إدارة الوقت.
- اتخاذ القرار.
- فن القيادة.
وبعدين نروح مع مشرفاتنا ونشتغل على مشروعنا, المشروع عبارة عن بناء
مكان مثل: مكتبة, معرض,....الخ.
وبعد ما خلصنا البرنامج التدريبي وعرضنا المشاريع سلمنا فيديو للمشروع
و تقرير. انتهينا قبل رمضان.
كل أسبوع كنا نسلم تقرير لمشرفة الكلية والمشرفة الإدارية في التدريب وتقرير
بشكل جماعي لمشرفة المشروع عن الشغل الي أنجزناه خلال الأسبوع.
في النهاية أعطونا شهادة خبرة لمشروع الفترة الصباحية.
ومشروع الفترة المسائية أعطونا إفادة والبنات المتميزات كرموهم
وأعطوهم شهادة.
بعد ما خلصنا التدريب حددنا مع مشرفة الكلية موعد للعرض.
العرض كان عبارة عن تعريف بالمكان الي أتدربتي فيه وعرض للي أنجزتيه خلال
التدريب.
وكمان سلمنا تقرير, التقرير مره طويل ويحتاج وقت فأنصحكم تبدأون فيه
وكل أسبوع تكتبون جزء عشان ما تنسون أيش اشتغلتوا.
نماذج ساعدتني في كتابة التقرير:
آخر شيء رح يطلع لك في الاستعلام الأكاديمي الشامل رمز NP دليل إنك اتجاوزتي الكورس.
نصيحة:
خذي التدريب على إنه فرصة يعرفك على بيئة العمل ويطور من مهاراتك لا
تأخذينه لعب وإنه مارح ينحسب في المعدل مجرد تجاوز وبس.
رأيي في التدريب:
بالنسبة لمشروعنا كان جداً كبير فكنا نضطر نشتغل في البيت بس باقي
القروبات كان الوضع مختلف بس بصفة عامة كانت تجربة مره ممتعة واتعلمت أشياء كثير
في وقت بسيط.
بالنسبة للمشرفات الاغلب كان مره متعاون ويساعد بشكل كبير الله
يسعدهم.
ليست هناك تعليقات:
إرسال تعليق